JCH-2026 saralashidan o‘rin olgan O‘zbekiston va Eron terma jamoalari o‘rtasidagi o‘yindan so‘ng, forslarning yetakchi futbolchilari o‘rtasida nizo kelib chiqqan.

Terma jamoa sardori Ehson Hojsafining O‘zbekistonga qarshi o‘yinda maydonga tushirilmasligi tufayli, sardorlik bog‘ichi "Roma" hujumchisi Sardor Azmunga berilgan edi. Bu esa Azmundan 3 yosh kattaroq bo‘lgan, "Portu" hujumchisi Mehdi Torimiga yoqmagan.

O‘zbekistonga qarshi o‘yinda, Azmun zaxiraga olinayotgan vaziyatda sardorlik bog‘ichini darvozabon Beyronvandga berishlarini so‘raydi. Azmunning bu harakati Torimining ikkinchi marta jahlini chiqaradi. Beyronvand esa bog‘ichni qabul qilishdan bosh tortib, uni Torimiga taqib qo‘yishlarini aytadi. Alamzada Mehdi bog‘ichga qo‘lini ham tekkizmaydi va bosh murabbiy G‘alenoidan o‘zini zaxiraga olishini so‘raydi.

Shundan so‘ng, Beyronvand sardorlik bog‘ichini qabul qiladi va Torimi ham o‘yinni davom ettiradi. Ammo, bitta sardorlik bog‘ichi tufayli terma jamoa yetakchilari o‘rtasida yuzaga kelgan nizo hozirda ko‘plab fors futbol nashrlarida muhokama qilinmoqda.