ЖЧ-2026 саралашидан ўрин олган Ўзбекистон ва Эрон терма жамоалари ўртасидаги ўйиндан сўнг, форсларнинг етакчи футболчилари ўртасида низо келиб чиққан.
Терма жамоа сардори Эҳсон Ҳожсафининг Ўзбекистонга қарши ўйинда майдонга туширилмаслиги туфайли, сардорлик боғичи "Рома" ҳужумчиси Сардор Азмунга берилган эди. Бу эса Азмундан 3 ёш каттароқ бўлган, "Порту" ҳужумчиси Меҳди Торимига ёқмаган.
Ўзбекистонга қарши ўйинда, Азмун захирага олинаётган вазиятда сардорлик боғичини дарвозабон Бейронвандга беришларини сўрайди. Азмуннинг бу ҳаракати Торимининг иккинчи марта жаҳлини чиқаради. Бейронванд эса боғични қабул қилишдан бош тортиб, уни Торимига тақиб қўйишларини айтади. Аламзада Меҳди боғичга қўлини ҳам теккизмайди ва бош мураббий Ғаленоидан ўзини захирага олишини сўрайди.
Шундан сўнг, Бейронванд сардорлик боғичини қабул қилади ва Торими ҳам ўйинни давом эттиради. Аммо, битта сардорлик боғичи туфайли терма жамоа етакчилари ўртасида юзага келган низо ҳозирда кўплаб форс футбол нашрларида муҳокама қилинмоқда.
