Kecha, 18 dekabr kuni Yevropaning eng kuchli xalqaro musobaqasi bo‘lmish Chempionlar ligasining pley-off bosqichiga qur’a tashlandi. Unda guruhdan chiqqan 16 ta jamoa o‘zlarining raqiblari nomini bilib olishdi. Unga ko‘ra, Angliya va qit’a chempioni "Manchester Siti" nimchorak final bosqichida Daniyaning "Kopengagen" klubi bilan to‘qnash keladi. Angliyaning turnirdagi ikkinchi vakili bo‘lmish "Arsenal" esa "Portu" bilan kuch sinashadigan bo‘ldi. APLning boshqa ikki jamoasi – "MYU" hamda "Nyukasl" yevrokuboklar bilan guruh bosqichidayoq xayrlashgan edi.

Qur’a tashlanganidan keyin superkompyuter jamoalarning imkoniyatlarini chamalab ko‘rdi. Algoritmlar asosida ishlaydigan mashina, guruh bosqichidagi natijalarni tahlil qilib, shunday xulosaga keldiki, joriy mavsumning ham chempioni "Manchester Siti" bo‘ladi. Qayd etilishicha, Pep Gvardiola jamoasi musobaqani yutish uchun 49 foiz imkoniyatga ega.
Keyingi o‘rinni Xarri Keyn va uning "Bavariya"si egallab turibdi. Myunxenliklarga sun’iy intellekt 18 foiz imkoniyat taqdim etgan. Shuningdek, kuchli to‘rtlikdan 14 foiz bilan Madridning "Real" klubi hamda "Arsenal" o‘rin egalladi. Ularda mos ravishda 14 va 9 foizlik imkoniyatlar mavjud. Ajablanarlisi, "Arsenal" "PSJ"dan yaxshiroq ko‘rsatkich qayd etib turibdi.

"Arsenal" so‘nggi bor YECHL pley-offida 2017 yilda ishtirok etgan. Ammo Arsen Venger davrida ham bu jamoaga turnirni yutish nasib etmagandi. Xususan, londonliklar 2010 yildan buyon YECHLda nimchorak finaldan uyog‘iga o‘ta olishmaydi.
"Manchester Siti"da esa vaziyat ancha yaxshi. "Shaharliklar" YECHLning so‘nggi 3 ta finalidan ikkitasida ishtirok etdi. Gvardiola jamoasida titulni ketma-ket yutish imkoniyati bor. Agarda shunday bo‘lsa, "Manchester Siti" bu ishni bajargan tarixdagi ikkinchi ingliz klubiga aylanadi. Ilk bor ushbu hodisa 1979 hamda 1980 yillarda "Nottingem Forest" bilan yuz bergandi.
"Manchester Siti" oxirgi marta nimchorak finalda 2016/17 yil, Gvardiolaning ilk mavsumida qoqiladi.

YECHLning joriy bosqichida, shuningdek, "Bavariya" va "Lasio" hamda "Real" bilan "Leypsig" o‘rtasidagi jang bo‘ladi. Qolaversa, o‘tgan mavsumda Ispaniya va Italiyada tengsiz deb topilgan "Barselona" va "Napoli" to‘qnashuvi ham e’tibor markazida bo‘lishi kutilmoqda.

ISMATOV J.