Thesun.co.uk sayti muxbiri Kostas Lianos APL klublarining eng mashhur futbolchilarini ularning liboslari sotuviga qarab aniqlashga urindi.
Keltirilgan ma’lumotlarning ayrimlari kutilmagan tuyulishi mumkin. The Athletic bergan xabarga ko‘ra, «Manchester Siti» yulduzi Xoland ayni damda «Ko‘hna qit’a»da eng ko‘p muxlisga ega, ya’ni uning libosi ancha ommabop. Bu borada u «Real» yarim himoyachisi Jud Bellingemni ortda qoldirdi. Shu sababli «shaharliklar»ning marketing borasidagi yuzi, aynan norvegiyalik super hujumchidir.
«Arsenal»ning eng mashhur futbolchisi Bukayo Saka. «To‘pchilar»ning aksariyat muxlislari aynan Saka yozuvi tushirilgan futbolkalardan foydalanishmoqda. Bu borada 22 yoshli vinger 105 million funtlik Deklan Raysni ortda qoldirgan. «Manchester Yunayted»ning eng xaridorgir libosi - Reshford nomi tushirilgan futbolkalar bo‘lib turibdi. Uning libosi sardor Brunu Fernandeshnikidan ko‘proq talabgorlarga ega. «Chelsi»ning eng ko‘p sotilayotgan libosi - bu Ris Jeyms yozuvlisidir. Bu borada jamoa sardori eng qimmat futbolchilar bo‘lgan Enso Fernandes va Moyzes Kaysedodan oldinda bormoqda. «Liverpul» marketing yo‘lini hali ham Muhammad Saloh nomi belgilab bermoqda. Garchand Salohning Saudiya Arabistoniga ketishi bilan bog‘liq mish-mishlar tobora avj olayotganiga qaramasdan, misrlik muxlislar tomonidan qadrlanadi. «Tottenxem» libosini istovchilar asosan Son Xyon Minga muxlislik qilishar ekan. «Nyukasl»ning xaridorgir liboslari Gimaraesh nomi bilan bozori chaqqonlashyapti. Rivojlanishda davom etayotgan «Aston Villa»da eng mashhur futbolchi Olli Uotkins, «Brentford» va «Brayton»da esa bu maqom mos ravishda Ayvan Touni va Kauru Mitomalarga tegishlidir.
Qolgan o‘rtamiyona klublarning eng xaridori ko‘p futbolkalari quyidagi futbolchilarga tegishli. Dominik Solanke, Manuel Benson, Eberechi Eze, Kalvert-Lyuin va Joau Palinyalar mos ravishda «Bornmut», «Byorn-li», «Kristal Pelas», «Everton» va Fulxem»da mashhur nomlarga aylangan. «Luton», «Nottingem», «Sheffild», «Vest Xem» va «Vulverxempton» uchun Pelli Ruddok, Gibbs-Uayt, Kameron Archer, Jarrod Bouen va Xi-CHanlar marketing yuzi bo‘lib bermoqda.
A.ABDUVALIXO‘JAYEV tayyorladi
