"Barselona" joriy mavsumning qoq yarmiga kelib, chempionlik uchun kurashda favorit maqomidan tushib qoldi. Ayni damda Xavi jamoasi "Real" va "Jirona"dan ancha ortda qolmoqda. Yangi Yil arafasida, barcha klublar uchun yagona mag‘lubiyat ham qattiq ta’sir qilishi turgan gap. Shu sabab buning oldi olinishi zarur. "Barsa" 18 turdan keyin yetakchi jamoalardan 7 ochko ortda qolmoqda. Bu narsa sababli ko‘pchilik ongida kataloniyaliklar chempionlik poygasidan chiqib ketdi degan xulosa shakllanishiga sabab bo‘ladi. Shuning uchun muammo kattalashib ketmasidan, unga yechim topish zarur. Quyida "Barselona" ko‘zlayotgan futbolchilarni bilib olasiz.
Hujum uchun
So‘nggi yillarda yoshi o‘tib qolgan futbolchilarning samarasi kam bo‘layotganini hisobga olsak, Xavi asosan Viktor Roke kabi yoshlarga e’tibor qaratishi aniq. Shuning uchun "ko‘k-anorranglilar" Janluka Prestianniga tushdi. "Veles" klubi tarbiyalanuvchisi hujum chizig‘ining istalgan qismida harakat qila oladi. U juda moslashuvchan. Ammo 17 yoshli hujumchiga da’vogarlar ko‘p. Xususan, "Benfika" va "Valensiya" allaqachon bu borada harakatni boshlab yuborgan.
Tayanch yarim himoyasi uchun
"Barselona" maydonning bu qismi uchun ham yosh futbolchilarni tanlashni maqsad qilgan. Avvalroq "Barsa" "Korintians" futbolchisi Gabriel Moskardo uchun kurashib ko‘rgandi. Ammo "PSJ" olg‘irroq chiqdi. 18 yoshli yarim himoyachi bilan Parij klubi kelishuvga erishdi. Moskardo uchun "Chelsi" ham poygada bo‘lgan.
Xavi ko‘zlayotgan yana bir variant bu "Tottenxem" yulduzi Jovanni Lo Chelbsodir. Argentina terma jamoasi a’zosi avval tayanch zonasida o‘ynamagan. Shu tufayli, bu tanlov "Barselona" manfaatlariga mos kelmasligi mumkin.
Qanot himoyasi uchun
Yaqin o‘tmishda "La-liga giganti bir necha marta "Liverpul" yulduzi Trent-Aleksander Arnold uchun "og‘iz solib" ko‘rgandi. Ammo bu urunishlar samara bermagan. Negaki, 25 yoshli futbolchi o‘z jamoasini o‘zgartirmasligini bildirgan.
"Barselona"ning o‘ng qanot himoyasi uchun ko‘zlab qo‘ygan eng jiddiy varianti bu Arnau Martinesdir. "Jirona" vakili o‘z jamoasining joriy yildagi muvaffaqiyatida katta hissa qo‘shmoqda. Ammo Martinesni ko‘ndirish uchun "Barsa"da qurollar mavjud. Negaki, Arnau bolaligining 6 yilini "Barselona" akademiyasida o‘tkazgan. Unga ayni damda "Manchester Siti" va "Real" qiziqish bilan qaramoqda. O‘z akademiyasidan chiqqani uchun Arnau Martinesni ro‘yxatga olish kataloniyaliklarga muammo tug‘dirmagan bo‘lardi.
ISMATOV J.
