Bugun O‘zbekiston terma jamoasi Osiyo kubogining 1/4 finalida mezbon Qatar terma jamoasiga qarshi maydonga chiqadi.

Bugun sizlarga Qatardagi stadionlar haqida qisqacha gapirib bermoqchiman. Men musobaqaning barcha 8 ta stadionida bo‘ldim (ochilish va final o‘tadigan "Lusayl" stadionidan tashqari).

Qayd etib o‘tish kerak, Jahon chempionatiga atab qurilgan stadionlarning aksariyati shahar markazidan tashqarida qurilgan. Albatta, ularga metro liniyasi tortilgan. Faqat, bugun bo‘ladigan uchrashuv final stadioni oldidagi "Lusayl" metrosidan qariyb 30 km narida Al-Xor shahridagi “Al-Bayt” stadionida bo‘lib o‘tadi. Metro stansiyasidan stadiongacha maxsus yo‘lak bilan to‘xtovsiz avtobuslar qatnovi yo‘lga qo‘yilgan. Tashkilotchilarga qoyil qolish kerak.

Qatardagi stadionlar haqida yozar ekanman, meni bir jihat hayratlantirdi. Stadionlar allaqachon bir sport musobaqasi o‘tkaziladigan joydan, madaniy hordiq o‘tkaziladigan maskanga aylanib bo‘lgan. Stadion yaqinida mollar (ko‘ngilchoar savdo markazlari) metro stansiyasi yoki katta jamoat transport tuguni bor. Bu maskanga faqat erkaklar semichka chaqish yoki so‘kinish uchun emas, oilalar — ayollari va farzandlari bilan kelishmoqda. Hattoki konservativ islomiy davlat hisoblanadigan Yaqin Sharqdagi mamlakatlar, jumladan, Saudiya Arabstonidan ham.

Ya’ni, stadion faqat futbol tomoshasi bilan cheklanmasligi, bu yer madaniy hordiq chiqaradigan maskanga aylanishi, konsertlar va turli qiziqarli tadbirlar ham o‘tadigan, atrofida istirohat bog‘i, savdo-ko‘ngilochar markazlar bilan uyg‘un tarzda qurilgan maskan bo‘lishi kerak ekan.

Buning uchun shahar markazidan ko‘ra shahardan chetroqdagi keng joylar tanlangani ma’qul ekan, degan fikrga keldim. Shahar markazida bunday sport ob’ektlari shaharning infrastrukturasiga salbiy ta’sir o‘tkazadi va ma’lum muddat harakat falajlanishiga olib keladi. Shovqinni aytmaysizmi?!

Albatta, o‘zimizda ham kelgusida qurilishi nazarda tutilgan bunday maskanlar shaharlarimiz chetida qurilishi, ular doim gavjum bo‘lishi uchun jamoat transporti tuguni, keng-mo‘l avtoturargohlar ham barpo etilishi lozim.

Shuhrat Shokirjonov.