Italiya mafiyalaridan biri «Marsel» klubi bosh murabbiyi Jennaro Gattuzo oilasidan pul talab qilgani ma’lum bo‘ldi. Bu haqda L'Equipe nashri xabar tarqatdi.

Manbaga ko‘ra, Gattuzoning otasi o‘ziga tegishli yer hududiga fotoelektr panelini o‘rnatmoqchi bo‘lib, buning uchun 80 ming yevro miqdorida pul olgan.

Jinoyatchilar esa undan pul talab qilgan va murabbiyning otasiga bosim o‘tkazish maqsadida uning qizi Ida Elvira Gattuzoning mashinasini 2 marta (oktyabr va dekabr) yoqib yuborishgan.

Shundan so‘ng Gattuzoning otasi polisiyaga murojaat qilgan. Ayni paytda polisiya ikki shubhali shaxsni qo‘lga olgan.

Ma’lumot o‘rnida. Gattuzo 2023 yilning sentyabr oyidan buyon «Marsel»ni boshqarib kelmoqda. Uning klubi bilan shartnomasi 2024 yilning yoziga qadar tuzilgan. "Marsel" Fransiya chempionatining 20-turidan so‘ng 8-o‘rinni egallab turibdi.