Bugun, 14 fevral kuni futbol bo‘yicha Osiyo chempionlar ligasining nimchorak final uchrashuvlari boshlanadi. Ahamiyatlisi shundaki, bugungi bahslarning biri Qarshi shahrida o‘tkaziladi. Unda “Nasaf” jamoasi BAAning “Al-Ayn” klubiga qarshi maydonga tushadi. Ushbu uchrashuv mahalliy vaqt bilan soat 19:00 da “Markaziy” stadionda bo‘lib o‘tadi.
Uchrashuvni Adham Muhammad Tumah Mahadmeh (Iordaniya) bosh hakam sifatida boshqaradi. Unga hamyurtlari Muhammad Mustafo Hassan Al Kalaf va Ahmad Moannes Nadi Alroalle yordam bersa, Mohanad Qosim EYEsee Sarray (Iroq) zaxira hakam deya belgilandi. VAR bo‘yicha Abdulla Ali Al Marri (Qatar), AVARda esa Muhammad Ahmad Muhammad (Qatar) faoliyat ko‘rsatadi. O‘yin nazoratchisi sifatida Kvon Jong Chul (Koreya Respublikasi), komissar esa Ali Jebril (Falastin) ishlaydi.
Afsuski, “Nasaf”ning 6 nafar futbolchisi: Sherzod Nasrullayev, Zafarmurod Abdurahmatov, Alibek Davronov, Zoran Marushich, Umid Ergashev va Islom Kenjaboyev turli sabablarga ko‘ra bu uchrashuvni o‘tkazib yuboradi.
