"Manchester Yunayted"ning hammuallifi ser Jim Retkliff futbol agenti Jorje Mendesh bilan uchrashdi.

Mendesh jahon futbolidagi eng nufuzli agentlardan biri bo‘lib, uning mijozlari orasida Krishtianu Ronaldu, Bernardu Silva, Darvin Nunyes, Pedru Netu va Joze Mourinyo kabi yulduzlar bor.

Ko‘p jihatdan aynan Mendesh bilan hamkorlik "Vulverxempton"ga Premyer-ligada o‘z o‘rnini topishiga yordam berdi. "Nottingem Forest" ham tez-tez Jorje xizmatlariga murojaat qiladi.

Endi "MYU"ning yangi rahbariyati Mendesh bilan aloqa o‘rnatishga harakat qilmoqda. Daily Mirror nashri xabariga ko‘ra, bu birinchi navbatda "qizil iblislar"ning "Benfika" yarim himoyachisi Joau Neveshga qiziqishi bilan bog‘liq, uning manfaatlarini Jorje himoya qiladi.

Portugaliya terma jamoasiga chaqirilgan 19 yoshli Nevesh "Manchester Yunayted"ning yozgi transfer oynasidagi asosiy maqsadlaridan biri hisoblanadi.

"Manchester Yunayted" shuningdek, Mendeshning boshqa mijozlariga, masalan, "Milan" hujumchisi Rafayel Leauga qiziqish bildirishi mumkin.