7 iyun kuni OKMK Superligadagi qisqa tanaffusdan unumli foydalanish maqsadida Toshkentning «Bunyodkor» klubiga qarshi nazorat o‘yinida maydonga tushdi.

O‘rtoqlik maqomida o‘tgan uchrashuvda OKMK murabbiylar shtabi kerakli rotasiyalarni amalga oshirib, Ikki xil tarkibni ko‘zdan kechirdi.

Qiziqarli kechgan bahsda dastlab «qaldirg‘ochlar» penaltidan hisobni ochib, birinchi taym yakunigacha minimal hisobdagi ustunlikni ushlab turishdi.

Lekin, ikkinchi taymda faollikni oshirgan OKMK FK 2 daqiqa ichida ikki bor raqib darvozasini ishg‘ol qilib, o‘yindagi vaziyatni o‘z tomoniga og‘dirishdi. Gollardan biriga Milyan Shkrbich mualliflik qilgan bo‘lsa, raqib o‘yinchisi Oybek Shomurodov o‘z darvozasiga to‘p kiritib qo‘yishi natijasida vakillarimiz 1:2 hisobida oldinga chiqib olishdi. Ammo oradan biroz vaqt o‘tib, «Bunyodkor» a’zolari yana muvaffaqiyat qozondi hamda o‘yindagi hisobni 2:2 ko‘rinishiga keltirishdi.

Shu tariqa, Toshkentda bo‘lib o‘tgan nazorat uchrashuvida darvozalarga boshqa to‘p kiritilmadi va jamoalar murosa ko‘chasini tanlashdi.

O‘rtoqlik o‘yini
«Bunyodkor» — OKMK FK - 2:2
Gollar: Temurxo‘ja Abduxoliqov (penalti), Mirjahon Mirahmadov, Milyan Shkrbich, Oybek Shomurodov (avtogol).