Portugaliya terma jamoasining sobiq futbolchisi Marku Kaneyra jurnalistlar bilan suhbatda darvozabon Diogu Koshtaning Sloveniyaga qarshi Yevropa chempionati 1/8 finalidagi ajoyib o‘yini haqida gapirdi. Penaltilar seriyasida darvozabon uchta zarbani qaytardi.
"Koshta uchta penaltini qaytardi va so‘nggi daqiqalarda saqlab qoldi. U penalti bo‘yicha mutaxassis. Jamoa bu g‘alaba uchun unga rahmat aytishi kerak. U ob’ektiv ravishda uchrashuvning eng yaxshi o‘yinchisi", - dedi Kaneyra.
Eslatib o‘tamiz, uchrashuv 0:0 hisobida durang bilan yakunlangan edi. Penaltilar seriyasida portugallar aniqroq harakat qilishdi – 3:0. Chorak finalda Roberto Martines shogirdlari Fransiya termasi bilan to‘qnash kelishadi.
