Joan Gamper kubogi bahsida "Barselona" "Monako"dan mag‘lub bo‘ldi (0:3). Monakoliklar tanaffusdan so‘ng raqib darvozasiga javobsiz uchta gol urib, yillik turnir mezbonlarini mag‘lub etishdi.

Bu "blaugrana"ning 2012 yildan beri Joan Gamper kubogidagi ilk mag‘lubiyatidir. Bundan tashqari, kataloniyaliklar 1981 yildan beri birinchi marta birorta ham gol ura olishmadi, shu bilan birga uch va undan ko‘p marta to‘p o‘tkazib yuborishdi.

43 yil oldin Germaniyaning "Kyoln" klubidan shunga o‘xshash mag‘lubiyatga uchrashgandi - 0:4. "Barselona" Joan Gamper kubogini 46 marta qo‘lga kiritgan.

Oxirgi 30 yil ichida jamoa bor-yo‘g‘i to‘rt marta – 2005, 2009, 2012 va 2024 yillarda turnirda g‘alaba qozona olmagan.