O‘zbekistonda o‘tkaziladigan FIFA futzal bo‘yicha Jahon chempionati startiga juda oz vaqt qolmoqda. Shu yilning 14 sentyabr kuni start oladigan ushbu turnir yurtimizning qadimiy va boy tarixga ega uchta shahri – Toshkent, Buxoro va Andijonda bo‘lib o‘tishidan xabaringiz bor.
Ushbu katta tadbir oldidan musobaqa tashkiliy qo‘mitasi mundial bahslarini o‘zida qabul qiladigan Buxoro va Andijon shaharlarida test rejimida nazorat uchrashuvlarini o‘tkazishga qaror qildi.
Dastlab, 17 avgust kuni Buxoro sport majmuasi, 24 avgust kuni esa Andijon sport majmuasi ushbu ikki uchrashuvni test rejimida o‘zlarida qabul qilishadi. Mazkur bahslarda o‘tmishning sobiq yulduzlaridan va hozirda milliy terma jamoada faoliyatini davom ettirayotgan futzalchilardan iborat O‘zbekiston milliy terma jamoasi Andijon va Buxoro yulduzlariga qarshi o‘yinlarda maydonga tushadi.
