Ўзбекистонда ўтказиладиган ФИФА футзал бўйича Жаҳон чемпионати стартига жуда оз вақт қолмоқда. Шу йилнинг 14 сентябрь куни старт оладиган ушбу турнир юртимизнинг қадимий ва бой тарихга эга учта шаҳри – Тошкент, Бухоро ва Андижонда бўлиб ўтишидан хабарингиз бор.
Ушбу катта тадбир олдидан мусобақа ташкилий қўмитаси мундиал баҳсларини ўзида қабул қиладиган Бухоро ва Андижон шаҳарларида тест режимида назорат учрашувларини ўтказишга қарор қилди.
Дастлаб, 17 август куни Бухоро спорт мажмуаси, 24 август куни эса Андижон спорт мажмуаси ушбу икки учрашувни тест режимида ўзларида қабул қилишади. Мазкур баҳсларда ўтмишнинг собиқ юлдузларидан ва ҳозирда миллий терма жамоада фаолиятини давом эттираётган футзалчилардан иборат Ўзбекистон миллий терма жамоаси Андижон ва Бухоро юлдузларига қарши ўйинларда майдонга тушади.
