All Start Boxing promouterlik kompaniyasi promouteri Ziyo Aliyevning Vesti.kz nashri muxbiriga ma’lum qilishicha, qozog‘istonlik og‘ir vaznli bokschi Ivan Dichko (14-0) yaqin orada hamyurtimiz Bahodir Jalolov (14-0) bilan jang qiladi.
Bungacha ikki bokschi faqat havaskor ringda to‘qnash kelishgan. Ular orasida o‘tkazilgan to‘rtta jangning barchasi qozog‘istonlik bokschi foydasiga hal bo‘lgan.
"Yaqin kunlarda Dichkoning navbatdagi jangidan so‘ng bizni qiziq yangiliklar kutib turibdi. Keyinchalik Jalolov va Dichko o‘rtasidagi jang bo‘lib o‘tishi uchun katta platformalar mavjud. Jalolov bilan jang bo‘lsa, Vanya uni to‘xtatib qo‘yadi", deydi Aliyev.
Ma’lumot o‘rnida, Dichko bugun tongda AQSHning Plant-Siti shahrida tashkil etilgan prof boks oqshomida amerikalik Kreyg Lyuisga qarshi jang qilib, g‘alaba qozondi.
