Qirg‘iziston milliy terma jamoasi futbolchisi Mirbek Axmataliyev jamoadoshi bilan mushtlashgani uchun 5 yilga diskvalifikasiya qilindi.
Bunday qaror Qirg‘iziston futbol ittifoqi (QFI) tomonidan qabul qilindi, deb xabar beradi AKIpress.
15 avgust kuni Bishkekdagi "Selmash" stadionida "Muras Yunayted" jamoasi mashg‘ulotlari vaqtida jamoa futbolchilari o‘rtasida mushtlashuv kelib chiqqan. Klub legioneri Yevgeniy Terzi jag‘ini sindirib oldi. Bunda Mirbek Axmataliyev aybdor deb topildi va klub uning shartnomasini bekor qilishga qaror qildi.
Uyushmaning tartib-intizom qo‘mitasi Axmataliyevni besh yilga futbol bilan bog‘liq har qanday faoliyat bilan shug‘ullanishdan chetlashtirishga qaror qildi.
Bu holat tufayli klub murabbiylar shtabi va sport direktori ham ishdan bo‘shatildi.
30 yoshli Axmataliyev Qirg‘iziston terma jamoasida 2016 yilda debyut qilgan.
