Қирғизистон миллий терма жамоаси футболчиси Мирбек Ахматалиев жамоадоши билан муштлашгани учун 5 йилга дисквалификация қилинди.
Бундай қарор Қирғизистон футбол иттифоқи (ҚФИ) томонидан қабул қилинди, деб хабар беради АКИpress.
15 август куни Бишкекдаги "Селмаш" стадионида "Мурас Юнайтед" жамоаси машғулотлари вақтида жамоа футболчилари ўртасида муштлашув келиб чиққан. Клуб легионери Евгений Терзи жағини синдириб олди. Бунда Мирбек Ахматалиев айбдор деб топилди ва клуб унинг шартномасини бекор қилишга қарор қилди.
Уюшманинг тартиб-интизом қўмитаси Ахматалиевни беш йилга футбол билан боғлиқ ҳар қандай фаолият билан шуғулланишдан четлаштиришга қарор қилди.
Бу ҳолат туфайли клуб мураббийлар штаби ва спорт директори ҳам ишдан бўшатилди.
30 ёшли Ахматалиев Қирғизистон терма жамоасида 2016 йилда дебют қилган.
