Boks bo‘yicha ikki karra Olimpiya o‘yinlari chempioni Hasanboy Do‘smatov o‘z titullarini yanada ko‘paytirish niyatida. "Professor" endilikda professional boksda jahon chempionlik kamarini qo‘lga kiritish barobarida Olimpiadalardagi uchinchi oltin medal sari odimlash niyatida.

- Bahodir Jalolovdan sardorlik bog‘ichini qabul qildingiz. Bu Los-Anjeles-2028 ga ham tayyorlanishingizga ishorami?
- Oldinda hali 4 yil vaqt bor. Hozircha bir nima deyish qiyin. Lekin o‘zimda keyingi Olimpiadada ham qatnashib, uch karra chempion bo‘lish niyati bor.

- Los-Anjeles yozgi Olimpiya o‘yinlariga yo‘llanma beruvchi musobaqalar boshlanguncha professional boksda chempionlik kamari uchun tushishga ulgurasizmi?
- Albatta, bunday reja bor. Professional boksda ham chempionlik kamarini qo‘lga kiritishni niyat qilganman. Buning uchun imkoniyatim yetarli. Hozir men o‘z vaznimda WBA yo‘nalishida majburiy da’vogar bo‘lib turibman.

- Sizga berilgan "professor" nomining kelib chiqishi qanday?
- Bu nomni murabbiylarimiz To‘lqin Qilichev va Rahmatjon Ro‘ziohunov 2022-yilgi Osiyo chempionatining finalida qozog‘istonlik Saken Bibosinov bilan jangda qo‘yishgan. Birinchi raundda imkoniyatni boy berdim. Keyin mening burchagimda xavotir boshlandi. Shunda murabbiylarimga suv va kapamni beringlar, hozir o‘zim hisobni to‘g‘rilayman dedim va vaziyatni o‘nglab keldim. Ya’ni qaysi vaziyatda nima qilish kerakligini bilganim uchun shundan beri ular meni "professor" deyishadi.