"Al-Hilol" hujumchisi Neymar professional faoliyatini boshlagan Braziliyaning "Santos" klubi Saudiya klubi bilan futbolchini olti oylik ijaraga olish borasida muzokara olib bormoqda. Bu haqda Globo Esporte xabar berdi.

Manbaga ko‘ra, "Santos" Neymarning otasi uchun taqdimot o‘tkazgan va unda sun’iy intellekt tomonidan yaratilgan videorolikni namoyish qilgan. Videoda braziliyalik afsonaviy futbolchi Pelening otasiga nima uchun o‘g‘li o‘z klubiga qaytishi kerakligini aytgan ovozi aks etgan. Bu video Neymarning otasiga qattiq ta’sir qildi.

32 yoshli hujumchi Saudiya Arabistoni chempionatining joriy mavsumida birorta ham o‘yin o‘tkazmagan. Uning klub bilan shartnomasi joriy mavsum oxirigacha amal qiladi. Transfermarkt Neymarning transfer qiymatini 15 million yevroga baholamoqda.