"Ал-Ҳилол" ҳужумчиси Неймар профессионал фаолиятини бошлаган Бразилиянинг "Сантос" клуби Саудия клуби билан футболчини олти ойлик ижарага олиш борасида музокара олиб бормоқда. Бу ҳақда Globo Esporte хабар берди.
Манбага кўра, "Сантос" Неймарнинг отаси учун тақдимот ўтказган ва унда сунъий интеллект томонидан яратилган видеороликни намойиш қилган. Видеода бразилиялик афсонавий футболчи Пеленинг отасига нима учун ўғли ўз клубига қайтиши кераклигини айтган овози акс этган. Бу видео Неймарнинг отасига қаттиқ таъсир қилди.
32 ёшли ҳужумчи Саудия Арабистони чемпионатининг жорий мавсумида бирорта ҳам ўйин ўтказмаган. Унинг клуб билан шартномаси жорий мавсум охиригача амал қилади. Transfermarkt Неймарнинг трансфер қийматини 15 миллион еврога баҳоламоқда.
