O‘zbekiston davlat jismoniy tarbiya va sport universitetining majlislar zalida O‘zbekiston belbog‘li kurash federasiyasining 2024-yil yakunlariga bag‘ishlangan tadbiri bo‘lib o‘tdi.
Tadbirda O‘zbekiston belbog‘li kurash federasiyasi raisi Ravshan Dastirov 2024-yil belbog‘li kurash sporti uchun yuksak natijalar va muvaffaqiyatlarga boy yil bo‘lganligini e’tirof etdi.
Tadbirda belbog‘li kurash federasiyasi tomonidan turli nominasiyalar bo‘yicha g‘oliblar aniqlandi.
Unga ko‘ra “Yilning eng yaxshi sportchisi” nominasiyasida o‘g‘il bolalar o‘rtasida Jamoliddin Ne’matullayev, qizlar o‘rtasida Farangiz Abdunabiyevalar loyiq ko‘rildi. “Yilning eng yaxshi murabbiyi” nominasiyasini kattalar terma jamoasi bosh murabbiyi Shavkat Mirzaqulov va yoshlar terma jamoasi bosh murabbiyi Baxtiyor Turg‘unpo‘latov qo‘lga kiritdi.
Shuningdek, “Yilning eng yaxshi musobaqa tashkilotchisi”ga Qoraqalpog‘iston Respublikasi va Farg‘ona viloyati belbog‘li kurash federasiyalari munosib ko‘rildi.
“Yilning eng yaxshi hakami” sifatida Sohibjon Qosimov (Buxoro), Alimardon Mirzayev (Andijon) e’tirof etilgan bo‘lsa, “Yilning eng yaxshi natijador federasiyasi” Andijon viloyati belbog‘li kurash federasiyasiga berildi. “Sport sohasidagi ko‘p yillik xizmatlari uchun” nominasiyasi g‘olibi deb Ahmad Mallaboyev (Namangan) e’lon qilindi.
