18 yoshli Xitoyning “Beyjin Goan” klubi himoyachisi Go Syasyuan Madridda “Alkobendas”ga qarshi o‘tkazilgan o‘rtoqlik uchrashuvida olgan jarohatidan so‘ng bir haftadan beri sun’iy nafas olish apparatida qolmoqda. Futbolchining miyasiga qon quyilgan. Bu haqda South China Morning Post xabar bermoqda.

Manbaning ma’lumotiga ko‘ra, tez yordam avtomobili ko‘magida shifoxonaga yotqizilgan futbolchiga bosh miyada qon ketishi kuzatilgan. Bunday jarohatdan so‘ng tiklanish imkoniyatlari deyarli yo‘qligi aniqlangan. Uchrashuvda raqib futbolchisi uning boshiga tizzasi bilan zarba bergan.

Ispaniyada futbolchini sun’iy nafas olish apparatidan uzish rejalashtirilgan edi. Ma’lum qilinishicha, unda klinik o‘lim qayd etilgan. Ammo sportchining oilasi klub rahbariyati va Xitoy futbol assosiasiyasini holatga jalb qilib, uning davolanishi va Xitoyga qaytarilishi uchun barcha xarajatlarni qoplashga ko‘ndira oldi.

Go Syasyuan 2023 yildan buyon “Beyjin Goan” safida o‘ynaydi. U, shuningdek, Xitoyning U-17 jamoasiga chaqirilgan. 2023 yilda Go “Bavariya” klubida eng istedodli yosh xitoylik futbolchi sifatida amaliyot o‘tagan.