“Real” klubi hujumchi Vinisius yangi shartnoma bo‘yicha klubda eng ko‘p maosh uniki bo‘lishini xohlamoqda. Bu haqda Cadena Ser ma’lumot berdi.

Manba bergan ma’lumotga ko‘ra, braziliyalik futbolchi yiliga 25 million yevro maosh olishni niyat qilgan.

24 yoshli futbolchining agenti klub vakillari bilan bir nechta muzokaralar o‘tkazdi. Dastlab braziliyalikning istagi rad etilgan. Keyingi uchrashuvda futbolchidan o‘z moliyaviy talablarini tushuntirish so‘raldi.

Ta’kidlanishicha, bugungi kunda Kilian Mbappe, Jud Bellingem va Vinisius yiliga 15 mln yevro oladi. Agar Vinisiusning 25 million yevrolik istagi qabul qilinsa, o‘z navbatida angliyalik va fransiyalik futbolchilar ham kelishuv shartlarini yaxshilashni talab qilishlari mumkin.

Manbaga ko‘ra, “Real” Vinisius istagan maoshni bermaydi. Shuningdek, Madrid klubi Braziliya milliy jamoasi vingeri bilan shartnoma imzolamoqchi bo‘lgan saudiyaliklar bilan raqobatlashish niyati yo‘qligini ma’lum qilgan.