O‘zbekiston professional futbol ligasi 2020 yildan buyon O‘zbekiston kubogining final uchrashuvini ketma-ketlikda turli shaharlarda o‘tkazib kelmoqda. Bunda mezbon stadion nomi musobaqaning guruh bosqichiga qur’a tashlanishidan avval aniqlab olinadi.
Har mavsum oldidan u yoki bu stadionda ta’mirlash ishlari olib borilayotgani, stadionlar Liga tomonidan qo‘yilayotgan talablarga moslashtirilayotgani sir emas. Aynan shu jihat finalni qabul qilish uchun da’vogar stadionlar ro‘yxatini shakllantiradi. 2020 yilda finalga Namangan mezbonlik qilgan bo‘lsa, keyinchalik hal qiluvchi o‘yinlar Samarqand, Buxoro, Qarshi, Farg‘ona shaharlarida o‘tkazildi.
2025 yilgi mavsumda bosh sovrin egasini aniqlab beradigan uchrashuvni qabul qilish uchun 3 ta shahar da’vogarlik qiladi: Andijon, Olmaliq va Termiz. So‘nggi yillarda mazkur arenalarda sezilarli o‘zgarishlar amalga oshirildi. Final o‘yini aynan kimga nasib qilishini bugungi qur’a oldidan O‘zbekiston milliy terma jamoasi bosh murabbiyi Temur Kapadze aniqlab beradi.
