"Milan" yarim himoyachisi Tidjani Reynders klub bilan shartnomasini uzaytirdi, deya xabar bermoqda Italiya jamoasi matbuot xizmati.

Qayd etilishicha, yangi bitim 2030 yil iyun oyi oxirigacha mo‘ljallangan.

26 yoshli niderlandiyalik futbolchi "Milan" safida 2023 yildan buyon to‘p tepib kelmoqda. Bu mavsumda u barcha musobaqalarda 40 ta o‘yin o‘tkazib, 12 ta gol urdi va 3 ta golli uzatmani amalga oshirdi.

Reynders 8 ta gol bilan A Seriyaning joriy mavsumida jamoaning eng yaxshi to‘purari bo‘lib turibdi. Transfermarkt portali futbolchining ayni damdagi narxini 50 million yevroga baholamoqda.