Osiyo Futbol Konfederasiyasi 2031 yilda bo‘lib o‘tadigan Osiyo Kubogi mezbonligiga ariza topshirgan nomzodlar nomini rasman ma’lum qildi, deb xabar beradi O‘FA matbuot xizmati.

Osiyo Futbol Konfederasiyasining 35-Kongressi oldidan Malayziyaning Kuala-Lumpur shahrida OFK Ijroiya qo‘mitasining 6-yig‘ilishi bo‘lib o‘tdi. Unda Osiyo Futbol Konfederasiyasi 2031 yilda bo‘lib o‘tadigan Osiyo Kubogiga mezbonlik qilish uchun 7 ta nomzoddan ariza kelib tushgani e’lon qilindi. OFK prezidenti Shayx Salmon bin Ibrohim Al Xalifa bu tashabbuslarni «turnir tarixidagi eng yuqori ko‘rsatkich», deya baholadi.

«OFK prezidenti qit’adagi barcha a’zo assosiasiyalarning yuksak fidoyiligi va tashabbusini e’tirof etdi», — deyiladi rasmiy xabarda.

Ta’kidlanishicha, OFK 2025 yil 31 martgacha milliy jamoalar o‘rtasidagi qit’a birinchiligini o‘zida qabul qilish uchun quyidagi assosiasiyalardan arizalarni qabul qildi:
Avstraliya, Hindiston, Indoneziya, Janubiy Koreya, Quvayt, BAA O‘zbekiston, Tojikiston va Qirg‘iziston (qo‘shma ariza).

«Kelib tushgan rekord darajadagi arizalar — bu turnirning nufuzini yana bir bor tasdiqlaydi. OFK Ijroiya qo‘mitasi nomidan barcha a’zo assosiasiyalarimizga chuqur minnatdorlik bildiraman», — dedi OFK prezidenti.

Endilikda OFK nomzod assosiasiyalar bilan belgilangan vaqt va talablar asosida tanlov hujjatlarini tayyorlash va topshirish jarayonini boshlaydi.