O‘zbekiston Milliy Olimpiya qo‘mitasiga Aichi-Nagoya yozgi Osiyo o‘yinlari tashkiliy qo‘mitasining delegasiyasi tashrif buyurdi.
MOQ rahbariyati yaponiyalik mutasaddilar bilan bo‘lajak musobaqaga hamkorlikda tayyorgarlik ko‘rish mavzusida uchrashuv o‘tkazdi.
Yaponiya tomoni O‘zbekiston MOQga tashrif buyurishdan minnatdor ekanini bildirib, mamlakatimiz Osiyoning yetakchi delegasiyalardan biriga aylanib ulgurganini e’tirof etdi.
Suhbat davomida mehmonlar bo‘lajak o‘yinlarga tayyorgarlik borasida taqdimot namoyish etishdi. Unga ko‘ra, yaponiyaliklar delegasiya a’zolarining yashash manzillari va ochilish marosimi bo‘yicha barchani hayratga soluvchi “sovg‘a” tayyorlashayotganini bildirdilar.
O‘z o‘rnida, MOQ rahbariyati yurtimizda Sport vazirligi, federasiya va assosiasiyalar bilan hamkorlikda bo‘lajak O‘yinlarga katta tayyorgarlik olib borilayotganini ma’lum qildi.
Shuningdek, tashkiliy qo‘mita vakillari O‘zbekiston tomonining ishtiroki uchun barcha jabhada kerakli sharoitlarni yaratishga yordam berishga tayyorligini bildirishdi.
