"Brayton" yarim himoyachisi Jeremi Sarmiyento yozda jamoasini o‘zgartirishi mumkin, ammo ekvadorlik xavbek uchun faoliyatini Yevropada davom ettirish ustuvor bo‘lib qolmoqda.
Bu haqda The Athletic xabar bermoqda. Avvalroq, 23 yoshli futbolchiga Braziliyaning "Kruzeyro" klubi jiddiy qiziqish bildirayotgan edi. Manbaga ko‘ra, tomonlar transfer shartlari bo‘yicha ham, futbolchining shaxsiy shartnomasi bo‘yicha ham kelishuvga erishgan. Biroq so‘nggi pallada Sarmiyento Yevropa futbolida qolishni rejalashtirayotganini bildirib, Braziliyaga ko‘chib o‘tishdan bosh tortdi.
O‘tgan - 2024/25 yilgi mavsumda Sarmiyento "Byornli" safida ijara asosida to‘p surdi va 39 ta o‘yinda maydonga tushib, raqiblar darvozasini besh marta ishg‘ol qildi. Uning "Brayton" bilan shartnomasi 2027 yilning iyun oyi oxirigacha mo‘ljallangan.
