Fransiyalik markaziy himoyachi Bafode Diakite "Lill"dan "Bornmut"ga o‘tdi. Bu haqda "giloslar" rasmiy sayti xabar bermoqda.

Tuzilgan bitimning davomiyligi aniqlashtirilmagan. Transfermarkt ma’lumotlariga ko‘ra, transfer qiymati 35 million yevroni tashkil qilgan.

"Men to‘pni nazorat qilishni va u bilan harakat qilishni yaxshi ko‘radigan himoyachiman. To‘p bilan ham, to‘psiz ham o‘z sifatlarimni ko‘rsatishga umid qilaman. Jamoaga bor kuchimni beraman va umid qilamanki, bizni ko‘plab ajoyib lahzalar kutmoqda," - deya futbolchining so‘zlarini keltiradi "Bornmut" matbuot xizmati.

24 yoshli futbolchi "Tuluza" tarbiyalanuvchisi hisoblanadi. U "Lill" safida 2022 yildan buyon to‘p tepib kelmoqda va ushbu jamoa safida barcha musobaqalarda 112 ta o‘yinda (13 ta gol, 3 ta golli uzatma) maydonga tushgan.