Франциялик марказий ҳимоячи Бафоде Диаките "Лилль"дан "Борнмут"га ўтди. Бу ҳақда "гилослар" расмий сайти хабар бермоқда.
Тузилган битимнинг давомийлиги аниқлаштирилмаган. Transfermarkt маълумотларига кўра, трансфер қиймати 35 миллион еврони ташкил қилган.
"Мен тўпни назорат қилишни ва у билан ҳаракат қилишни яхши кўрадиган ҳимоячиман. Тўп билан ҳам, тўпсиз ҳам ўз сифатларимни кўрсатишга умид қиламан. Жамоага бор кучимни бераман ва умид қиламанки, бизни кўплаб ажойиб лаҳзалар кутмоқда," - дея футболчининг сўзларини келтиради "Борнмут" матбуот хизмати.
24 ёшли футболчи "Тулуза" тарбияланувчиси ҳисобланади. У "Лилль" сафида 2022 йилдан буён тўп тепиб келмоқда ва ушбу жамоа сафида барча мусобақаларда 112 та ўйинда (13 та гол, 3 та голли узатма) майдонга тушган.
