Braim Dias va "Real" yangi shartnoma shartlarini to‘liq kelishib olishdi.

Marokash terma jamoasining 26 yoshli hujumkor yarim himoyachisining "Madrid" bilan shartnomasi 2027 yilgacha mo‘ljallangan bo‘lib, tomonlar allaqachon uzoq muddatli kelishuvga erishgan va bu haqda yaqin oylarda rasman e’lon qilinishi kutilmoqda. Shartnoma 2030 yilgacha uzaytirilishi aytilgan edi.

ESPN xabariga ko‘ra, bosh murabbiy Xabi Alonso yozda "Real"ni boshqarishdan oldin Braimga qo‘ng‘iroq qilib, futbolchining jamoadagi o‘rni va unga nisbatan rejalari haqida gapirgan. Xabi futbolchiga ishonch bildirdi va Braym "Real"ning yangi murabbiyi bilan suhbatdan juda mamnun bo‘ldi.

Dias yozda ham, o‘tgan yili ham Yevropaning bir qator klublaridan taklif bo‘lganiga qaramay, "Real"da qolish istagini bildirgan. ESPN xabariga ko‘ra, "PSJ" 2024 yilda Braimga qiziqish bildirgan jamoalardan biri edi.

O‘tgan mavsumda Dias "Real" safida 56 ta o‘yinda maydonga tushib, 8 ta gol urdi va 6 ta golli uzatmani amalga oshirdi.