Nunu Eshpiritu Santu "Nottingem Forest" bosh murabbiyligidan iste’foga chiqarildi.
51 yoshli mutaxassisning iste’fosini Record, Sky Sports, Devid Ornshteyn va boshqa nufuzli manbalar tasdiqlamoqda.
Tez orada portugaliyalikning iste’fosi rasman e’lon qilinadi.
O‘tgan oyda Nunu klub xo‘jayini Evangelos Marinakis bilan munosabatlari buzilganini tan olgandi.
Bu gaplar murabbiyni ishdan bo‘shatishni rejalashtirmagan Marinakisni hayron qoldirdi. Nununing bayonotlaridan so‘ng, klubning ba’zi vakillari uning ishga sodiqligiga shubha qilishdi.
"Nottingem Forest"ni "Tottenxem" sobiq ustozi Ange Postekoglu boshqarishi mumkin, deya ta’kidlamoqda jurnalist Ben Jeykobs. Shuningdek, lavozimga Domeniko Tedesko da’vogarlik qilmoqda.
Nunu 2023 yilning dekabrida "Forest"ni qabul qilib olgandi. Uning qo‘l ostida jamoa 2024/25 yilgi mavsum yakunlariga ko‘ra APLda yettinchi o‘rinni egalladi va Yevropa Ligasiga yo‘l oldi.
Joriy mavsumda "Nottingem Forest" Premyer-liganing uchta o‘yinida 4 ochko jamg‘arib, turnir jadvalida 10-o‘rinda bormoqda.
