Superliga 21-turidan o‘rin olgan "Mash’al" - "Sho‘rtan" (2:1) uchrashuvidan so‘ng "Mash’al" bosh murabbiyi Otabek Narzullayev matbuot anjumanida ishtirok etdi.
- O‘yin haqida fikringiz?
- Bu o‘yin biz uchun juda muhim edi. Bu mavsum davomidagi eng muhim uchrashuvlardan biri bo‘ldi. Ham derbi maqomida kechgani bilan qiziq bo‘ldi. Qo‘lga kiritilgan g‘alaba bilan barcha muborakliklarni tabriklayman.
- Ikkala taymda ikki xil "Mash’al"ni ko‘rdik.
- Bu - futbol va futbolda har xil vaziyatlar bo‘lishi mumkin. Birinchi taym 2:0 hisobida oldinda borib biroz erkinlikka berildik. Esingizda bo‘lsa, "Dinamo" bilan ham shunday bo‘lgandi va o‘shanda 2:0 hisobida oldinga chiqib olgandik. Yakunda esa g‘alaba qozona olmagandik. Bugun ham shunday voqea takrorlanmasligi uchun diqqatni yo‘qotmaslikka harakat qildik.
- "Sho‘rtan"ga necha baho qo‘ygan bo‘lardingiz?
- G‘uzorliklarda ham yaxshi jamoa va yaxshi yoshlar bor. Ular ham yaxshi o‘yin ko‘rsatyapti. Turnir jadvalining pastki o‘rindaligi hech nimani anglatmaydi. Futbol o‘ynagan jamoa borki baribir xato qiladi.
- Raqib siz kutgan futbolni namoyish etdimi?
- Biz "Sho‘rtan" bor kuchini berib harakat qilishini bilardik. Shunga yarasha yigitlarga agressiv futbol namoyish etish va ko‘proq pressing qilishni uqtirgandik. Asosiysi yutib oldik. Lekin baribir kamchiliklar bor va bular ustida ishlaymiz. Vazifamiz Superligada o‘z o‘rnimizni saqlab qolish.
- Xumoyun Murtazoyevning hozirgi holati qanday?
- "So‘g‘diyona" bilan o‘rtoqlik uchrashuvida Xumoyun Murtazoyev, Sardor Abduraimov va Dmitriy Yashinda yengil jarohat bo‘lgani bois maydonga tushirmagandik. Ularni bugungi bellashuv uchun asragandik. Hozir esa bu futbolchilarimizning holati yaxshi.
- Hakamlik haqida fikringiz?
- 2016-2017 yoki undan oldingi davr futboli paytida safarga borganda qo‘rqib turardik. Jamoalar ayniqsa hakamlikdan cho‘chirdi. Hozir esa yaxshiki vaziyat o‘zgardi. Hozir jamoangiz kuchli bo‘lsa uyda ham, safarda ham yuta oladi. Hakamlik bizda yangi darajaga chiqdi. Qolaversa VAR paydo bo‘ldi.
- Agar "Mash’al" uy uchrashuvlarini Muborakda o‘tkazib kelganida ochkolar soni hozirgidan ko‘proq bo‘larmidi?
- Menimcha, ha. Chunki bejizga uyda devorlar ham yordam beradi deyishmaydi. Uyda o‘ynash baribir boshqacha. Futbolchilar ham o‘zlarini ancha zo‘r his qiladi. To‘g‘ri, stadion bo‘yicha kamchiliklar bor, vaqti kelib hammasi barham topadi degan umiddaman.
