2025 yilning 22 sentyabrida bo‘lib o‘tadigan «Oltin to‘p» taqdimotidan oldin hakamlar hay’atidagi o‘zgarishlar ma’lum bo‘ldi, deb xabar bermoqda «Frenchfootballweekly.com».

«France Football» bosh muharriri Vensan Garsiya podkastda ma’lum qilishicha, bu yil Trinidad va Tobago, Namibiya hamda Armaniston ovoz berish huquqidan mahrum etilgan.

Bu mamlakatlar FIFA reytingida birinchi yuzlikdan chiqib ketgani uchun avtomatik tarzda ovoz berish jarayonidan chiqarilgan.

Ularning o‘rniga hay’atga Gvatemala, Mozambik va Kosovo vakillari kiritildi. Ular ilk bor «Oltin to‘p» sohibini aniqlashda qatnashish imkoniyatiga ega bo‘ldi.

Davlatlar rotasiyasi 2022 yildan amalga oshirilayotgan islohotning bir qismi hisoblanadi. Unga ko‘ra, ovoz berish huquqi faqatgina FIFA reytingidagi yetakchi 100 mamlakat jurnalistlariga beriladi. Bu chora oshkoralikni oshirish va oldin tanqidlarga sabab bo‘lgan tortishuvli ovozlarni yo‘qotish maqsadida kiritilgan.

Tashkilotchilarning qayd etishicha, mazkur jarayon har yili o‘tkaziladi va to‘g‘ridan-to‘g‘ri jahon reytingidagi o‘zgarishlarga bog‘liq. Shu bilan birga, bu yilgi rotasiya 2025 yilgi mukofot natijasiga ta’sir qilmaydi, chunki barcha ovozlar allaqachon qabul qilinib, qayta ishlangan. Jurnalistlar 30 nomzodni baholab, ularga «top-10» ichidagi o‘rinlarni berdi va 2024 yilda joriy etilgan yangi tizim asosida ball taqsimladi.