2025 йилнинг 22 сентябрида бўлиб ўтадиган «Олтин тўп» тақдимотидан олдин ҳакамлар ҳайъатидаги ўзгаришлар маълум бўлди, деб хабар бермоқда «Frenchfootballweekly.com».

«France Football» бош муҳаррири Венсан Гарсия подкастда маълум қилишича, бу йил Тринидад ва Тобаго, Намибия ҳамда Арманистон овоз бериш ҳуқуқидан маҳрум этилган.

Бу мамлакатлар ФИФА рейтингида биринчи юзликдан чиқиб кетгани учун автоматик тарзда овоз бериш жараёнидан чиқарилган.

Уларнинг ўрнига ҳайъатга Гватемала, Мозамбик ва Косово вакиллари киритилди. Улар илк бор «Олтин тўп» соҳибини аниқлашда қатнашиш имкониятига эга бўлди.

Давлатлар ротацияси 2022 йилдан амалга оширилаётган ислоҳотнинг бир қисми ҳисобланади. Унга кўра, овоз бериш ҳуқуқи фақатгина ФИФА рейтингидаги етакчи 100 мамлакат журналистларига берилади. Бу чора ошкораликни ошириш ва олдин танқидларга сабаб бўлган тортишувли овозларни йўқотиш мақсадида киритилган.

Ташкилотчиларнинг қайд этишича, мазкур жараён ҳар йили ўтказилади ва тўғридан-тўғри жаҳон рейтингидаги ўзгаришларга боғлиқ. Шу билан бирга, бу йилги ротация 2025 йилги мукофот натижасига таъсир қилмайди, чунки барча овозлар аллақачон қабул қилиниб, қайта ишланган. Журналистлар 30 номзодни баҳолаб, уларга «топ-10» ичидаги ўринларни берди ва 2024 йилда жорий этилган янги тизим асосида балл тақсимлади.