"Kristal Pelas" tayanch yarim himoyachisi Adam Uorton qishki transfer oynasida klubni tark etmasligi ehtimoli katta. Bu haqda Football Insider xabar berdi.
Manbaga ko‘ra, "burgutlar" yanvar oyida 21 yoshli xavbek bo‘yicha keladigan barcha takliflarni rad etishmoqchi. Ta’kidlanishicha, futbolchiga "Liverpul" va "Real" klublari jiddiy qiziqish bildirmoqda.
Bu mavsumda Uorton barcha musobaqalarda yettita o‘yinda maydonga tushdi va bitta golli uzatmani amalga oshirdi.
Uortonning "Kristal Pelas" bilan amaldagi mehnat shartnomasi 2029 yilning yozigacha mo‘ljallangan. Nufuzli Transfermarkt portali mutaxassislari futbolchining narxini 45 million yevroga baholamoqda.
