Yevropa chempionlar ligasiining umumiy bosqichi 2-turidan o‘rin olgan «Qayrat» – «Real Madrid» uchrashuvi oldidan katta ajiotaj kuzatilmoqda. Ushbu bellashuv 30 sentyabr kuni Olma-Otadagi «Markaziy» stadionida bo‘lib o‘tadi.

Manbaning ma’lum qilishicha:

«Odamlar ertalabdanoq “Qayrat” tomonidan ruxsat berilgan turli maydonchalarda, jumladan rasmiy sayt orqali ro‘yxatdan o‘tishni boshladi. Savdolar rasman boshlanishidan bir soat oldinoq 50 mingta ariza kelib tushdi, savdo boshlanganidan bir soat o‘tib esa ular soni 215 mingtaga yetdi.

Rasman e’lon qilindi: chiptalar bir karta va individual kod orqali cheklanadi. Spekulyasiyalarni oldini olish maqsadida chiptalar uchrashuv boshlanishidan olti soat oldin beriladi. Bu jihatdan “Qayrat” yaxshi ishladi. Xavfsizlik nuqtai nazaridan stadionning birinchi qatorlari sotilmaydi. Stadion sig‘imi taxminan 23 ming tomoshabinga mo‘ljallangan.

Chiptalar Qozog‘iston va hatto Yevropa miqyosida juda qimmat hisoblanadi. «Barselona» — «Real Madrid» derbisiga ham arzonroq chipta topish mumkin. Bu uchrashuv uchun Qozog‘istonga «Real» muxlislaridan juda ko‘p kishi kelishi kutilyapti. Bunday ajiotaj oxirgi marta “Qayrat” YECHL saralash bosqichida “Seltik”ka qarshi o‘ynaganida kuzatilgandi — o‘sha paytda o‘n minglab odamlar o‘yinga kira olmagan. Milliy jamoa bilan ham shunday holat 2010 yilgi Jahon chempionati saralashida, Angliya Bekxem va Runi bilan kelganida sodir bo‘lgan edi», — deb ma’lum qildi vaziyatdan xabardor manba «Chempionat» muxbiri Nikolay Baranovga.