«Pari Sen-Jermen» bosh murabbiyi Luis Enrike Chempionlar ligasi umumiy bosqichi 2-turida «Barselona»ga qarshi o‘yinda (2:1) qozonilgan g‘alabadan so‘ng musobaqaning asosiy favoriti haqida fikr bildirdi.

«Men uchun «Barselona» — Chempionlar ligasida g‘alaba qozonishga asosiy da’vogar. Ular juda ajoyib o‘ynayapti, musobaqa endigina boshlandi. Ko‘p jamoalarda bunday aniq o‘yin uslubi yo‘q. O‘tgan mavsum umumiy bosqichni qayerda yakunlaganimizni eslab ko‘ring. Shubhasiz, «Barselona» — va, umid qilamanki, biz ham — LCHda g‘alaba uchun da’vogarmiz. Asosiy kurash pley-offda boshlanadi, o‘shanda har bir jamoa qay tarzda harakat qilajagini ko‘ramiz», — deya Enrikening so‘zlarini Marca nashri keltiradi.

Keyingi turda fransuz grandi Germaniyaning «Bayer» jamoasiga qarshi o‘ynaydi. «Ko‘k-anorranglilar» esa Gresiyaning «Olimpiakos» klubiga qarshi bahs olib boradi. Har ikki o‘yin 21 oktyabrda bo‘lib o‘tadi.