Xalqaro futbol assosiasiyalari federasiyasi (FIFA) prezidenti Janni Infantino joriy yil yozida AQSHda bo‘lib o‘tgan klublar o‘rtasidagi jahon chempionati haqida fikr bildirib, turnirni muvaffaqiyatli deb baholadi.

«Chempionlar ligasi yaratilganida uning dastlabki daromadi 40 million yevro edi, hozir esa 4 milliard yevroga yetdi. Agar ilk klublar o‘rtasidagi jahon chempionati 2 milliard yevro yig‘gan bo‘lsa, demak 30 yildan keyin bu raqam 200 milliard yevro bo‘lishi kerak. Bu klublarga katta foyda keltiradi. Biz klublar va barcha manfaatdor tomonlar bilan hamkorlikda uni yanada yaxshi va ko‘lamli qilish ustida ishlaymiz, chunki bu hammaning manfaatiga xizmat qiladi.

Men, albatta, noxolis bo‘lishim mumkin, lekin bu barcha jihatdan ulkan muvaffaqiyat bo‘ldi. Stadionlarimizda 2,5 million tomoshabin yig‘ildi. O‘rtacha tashrif 40 ming kishini tashkil etdi va bu borada faqat Angliya Premyer-ligasi yuqori ko‘rsatkichga ega. Butun dunyoda qiziqish katta, bizga esa aynan shu qiziqish milliy, Yevropa va jahon musobaqalarini rivojlantirish uchun zarur», — deb Infantinoning so‘zlarini "Sky Sports" jurnalisti Kave Solxekol keltiradi.