A Seriya haqiqiy «golsizlik inqirozi»ni boshidan kechirmoqda. Italiya chempionati hozirda Yevropaning beshta to‘p-5 ligasi ichida eng kam gol uriladigan musobaqaga aylandi. Joriy mavsumdagi 110 ta uchrashuvning 17 tasi 0:0 hisobi bilan yakunlangan — bu barcha o‘yinlarning 15,5 foizini tashkil etadi. Solishtirish uchun: Angliya Premyer-ligasida faqat 6,4 foiz o‘yinlar golsiz tugagan, Fransiyada — 4,6%, Germaniyada — 4,4%, Ispaniyada — 4,2%.
Joriy mavsumda A Seriyada eng ko‘p qayd etilgan hisob — 0:0. Keyingi o‘rinlarda 1:1 (13 marta) va 0:1 (11 marta) turibdi. Umuman olganda, 59,1% o‘yinlar (110 ta bahsdan 65 tasi) ikkita yoki undan kam gol bilan yakunlangan — bu ko‘rsatkich Bundesligadagi (36,7%)dan ancha yuqori. Chempionatning yana bir xususiyati — duranglar ulushining yuqoriligi: 38 ta uchrashuv (34,6%) shunday yakunlangan va bu ko‘rsatkich Yevropadagi barcha yetakchi ligalar ichida eng yuqorisi hisoblanadi.
2017 yildan 2022 yilgacha A Seriya har mavsum 1000 tadan ortiq gol urish chegarasini bosib o‘tardi, rekord esa 2020/21 yilgi mavsumda qayd etilgan — 1163 to‘p. Ammo so‘nggi uch yilda bu ko‘rsatkich yomonlashdi: o‘tgan mavsum 973 gol bilan yakunlangan — bu 2011/12 yilgi mavsumdan (971 gol) keyingi eng past natija.
Hozircha, 11 turdan so‘ng, jami 244 gol kiritilgan (o‘rtacha har turda 22,2 to‘p), bu esa mavsum oxirigacha taxminan 850 gol bo‘lishini ko‘rsatmoqda. Solishtirish uchun: Bundesligada hozir 290 gol (o‘rtacha 3,21 har o‘yinda), Liga 1da — 315 (2,92), La Ligada — 301 (2,74), Angliya Premyer-ligasida esa — 313 (2,61).
Bu holat to‘purarlar ro‘yxatida ham aks etmoqda: Germaniyada Harri Keyn (13 gol), Fransiyada Xoakin Panichelli (9), Ispaniyada Kilian Mbappe (13), Angliyada Erling Xoland (14) yetakchilik qilsa, Italiyada eng ko‘p gol urganlar — atigi 5 tadan to‘p bilan Hakan Chalhano‘g‘li va Rikkardo Orsolini.
Shu bilan birga, boshqa mamlakatlarda yetakchilar klassik hujumchilar bo‘lsa, Italiyada — yarim himoyachi va qanot o‘yinchisi. Buning o‘ziyoq shuni tasdiqlaydiki: samaradorlik muammolari faqat «Roma» kabi ayrim jamoalarda emas, balki butun chempionat miqyosida kuzatilmoqda.
