Bugun Sport vazirligida AQSHning O‘zbekistondagi Favqulodda va Muxtor elchisi Jonatan Xenik ishtirokida uchrashuv bo‘lib o‘tdi.

Tadbirda Vazirlik, Milliy Olimpiya qo‘mitasi hamda O‘zbekiston futbol assosiasiyasi rahbariyati qatnashib, tomonlar ikki davlat o‘rtasidagi sport sohasidagi hamkorlik istiqbollarini muhokama qildi.

Ma’lumki, AQSH 2026 yil futbol bo‘yicha jahon chempionati mezbonlaridan biri, shuningdek, 2028 yilgi yozgi Olimpiya o‘yinlarini qabul qiladigan mamlakat sanaladi.

Shu munosabat bilan, uchrashuv davomida delegasiyamizning ushbu yirik xalqaro musobaqalardagi ishtirokini ta’minlash, tashkiliy masalalarni kelishib olish hamda hamkorlikni yanada kengaytirish kabi masalalar ko‘rib chiqildi.

Xususan, janob Xenik o‘zbek sportida erishilayotgan ulkan yutuqlar, har ikki mamlakat yetakchilari o‘rtasidagi do‘stona aloqalarni e’tirof etib, elchixona zarur hujjatlarni rasmiylashtirish jarayonida amaliy ko‘mak ko‘rsatishga tayyorligini bildirdi.