Angliyalik yarim himoyachi Jessi Lingard 2025 yilgi mavsum yakunida Janubiy Koreyaning "Seul" klubini tark etadi, deya xabar bermoqda klub rasmiy sayti.
2024 yilning fevralidan buyon "Seul" sharafini himoya qilib kelayotgan 32 yoshli futbolchi OCHL elit bosqichi 6-turi doirasida 10 dekabr, chorshanba kuni Avstraliyaning "Melburn Siti" klubiga qarshi xayrlashuv uchrashuvini o‘tkazadi.
"Bu oson qaror bo‘lmadi. Janubiy Koreyada o‘tkazgan vaqtim aql bovar qilmas darajada bo‘ldi - klub atrofidagi futbol, muhit va ishtiyoq yuqori darajada edi. Ikki yil davomida menga ko‘rsatilgan mehr, qo‘llab-quvvatlash va e’tibor haqiqatan ham ajoyib bo‘ldi," - deb yozdi ingliz o‘zining Instagram sahifasida.
"Seul"dagi ikki mavsumda Jessi 66 ta o‘yin o‘tkazib, 18 ta gol urdi va 10 ta golli uzatmani amalga oshirdi, shuningdek, vaqti-vaqti bilan jamoa sardori vazifasini bajardi.
Lingard faoliyatini qayerda davom ettirishi hozircha ma’lum emas.
