Англиялик ярим ҳимоячи Жесси Лингард 2025 йилги мавсум якунида Жанубий Кореянинг "Сеул" клубини тарк этади, дея хабар бермоқда клуб расмий сайти.
2024 йилнинг февралидан буён "Сеул" шарафини ҳимоя қилиб келаётган 32 ёшли футболчи ОЧЛ элит босқичи 6-тури доирасида 10 декабрь, чоршанба куни Австралиянинг "Мелбурн Сити" клубига қарши хайрлашув учрашувини ўтказади.
"Бу осон қарор бўлмади. Жанубий Кореяда ўтказган вақтим ақл бовар қилмас даражада бўлди - клуб атрофидаги футбол, муҳит ва иштиёқ юқори даражада эди. Икки йил давомида менга кўрсатилган меҳр, қўллаб-қувватлаш ва эътибор ҳақиқатан ҳам ажойиб бўлди," - деб ёзди инглиз ўзининг Instagram саҳифасида.
"Сеул"даги икки мавсумда Жесси 66 та ўйин ўтказиб, 18 та гол урди ва 10 та голли узатмани амалга оширди, шунингдек, вақти-вақти билан жамоа сардори вазифасини бажарди.
Лингард фаолиятини қаерда давом эттириши ҳозирча маълум эмас.
