Madridning “Real” klubi futbolchisi Arda Gyuler faoliyatini Angliya Premyer Ligasida davom ettirishi mumkin. Caught Offside nashri xabariga ko‘ra, turkiyalik yarim himoyachiga “Liverpul”, “Manchester Yunayted” va “Arsenal” jiddiy qiziqish bildirmoqda.

Manbaga ko‘ra, “Liverpul” turk futbolchini sotib olish uchun asosiy favorit hisoblanadi. Gyuler 33 yoshli misrlik vinger Muhammad Salohga o‘rinbosar sifatida ko‘rilmoqda. Chunki Saloh qishki transfer oynasi vaqtida “qizillar” safini tark etishi mumkin. Shu bois mersisaydliklar rahbariyati vinger uchun o‘rinbosar qidirmoqda. Chunki Gyuler ko‘p hollarda o‘ng qanot vingeri sifatida ham o‘ynamoqda. Uning universalligi “Liverpul” rahbariyatiga ma’qul kelgan.

Shuningdek, “Manchester Yunayted” hamda “Arsenal” ham Gyulerning atrofidagi vaziyatni diqqat bilan kuzatmoqda. Manbada yozilishicha, Ruben Amorim futbolchini 2026-yilning yozida jamoaga olib kelishni maqsad qilgan.

Ammo Gyulerning kelajagi hozircha aniq emas. Shu bilan birga, “Real” 20 yoshli futbolchini qo‘yib yubormoqchi emas, chunki Arda klubning uzoq yillik rejalarida muhim rol o‘ynaydi. Qolaversa, turkiyalik vinger yaxshi o‘yinlar ko‘rsatmoqda.

Ma’lumot uchun, joriy mavsum Gyuler barcha turnirlar doirasida jami 21 o‘yinda maydonga tushib, 3 gol va 7 golli uzatma muallifiga aylangan. Futbolchining amaldagi shartnomasi 2029 yil yozigacha mo‘ljallangan. Transfermarkt ma’lumotlariga ko‘ra, Gyulerning bozor qiymati 60 million yevroga baholanmoqda.