Мадриднинг “Реал” клуби футболчиси Арда Гюлер фаолиятини Англия Премьер Лигасида давом эттириши мумкин. Caught Offside нашри хабарига кўра, туркиялик ярим ҳимоячига “Ливерпуль”, “Манчестер Юнайтед” ва “Арсенал” жиддий қизиқиш билдирмоқда.

Манбага кўра, “Ливерпуль” турк футболчини сотиб олиш учун асосий фаворит ҳисобланади. Гюлер 33 ёшли мисрлик вингер Муҳаммад Салоҳга ўринбосар сифатида кўрилмоқда. Чунки Салоҳ қишки трансфер ойнаси вақтида “қизиллар” сафини тарк этиши мумкин. Шу боис мерсисайдликлар раҳбарияти вингер учун ўринбосар қидирмоқда. Чунки Гюлер кўп ҳолларда ўнг қанот вингери сифатида ҳам ўйнамоқда. Унинг универсаллиги “Ливерпуль” раҳбариятига маъқул келган.

Шунингдек, “Манчестер Юнайтед” ҳамда “Арсенал” ҳам Гюлернинг атрофидаги вазиятни диққат билан кузатмоқда. Манбада ёзилишича, Рубен Аморим футболчини 2026-йилнинг ёзида жамоага олиб келишни мақсад қилган.

Аммо Гюлернинг келажаги ҳозирча аниқ эмас. Шу билан бирга, “Реал” 20 ёшли футболчини қўйиб юбормоқчи эмас, чунки Арда клубнинг узоқ йиллик режаларида муҳим рол ўйнайди. Қолаверса, туркиялик вингер яхши ўйинлар кўрсатмоқда.

Маълумот учун, жорий мавсум Гюлер барча турнирлар доирасида жами 21 ўйинда майдонга тушиб, 3 гол ва 7 голли узатма муаллифига айланган. Футболчининг амалдаги шартномаси 2029 йил ёзигача мўлжалланган. Transfermarkt маълумотларига кўра, Гюлернинг бозор қиймати 60 миллион еврога баҳоланмоқда.