"Manchester Siti" darvozaboni Janluiji Donnarumma FIFA talqini bo‘yicha o‘tgan mavsumning eng yaxshi darvozaboni deb topildi. U eng yaxshi darvozabonga beriladigan The Best mukofotini qo‘lga kiritdi.
O‘tgan yili Italiya terma jamoasi darvozaboni "PSJ" safida Chempionlar ligasi, Fransiya chempionati, mamlakat kubogi va Superkubogida g‘olib chiqdi.
Shuningdek, Alisson Bekker ("Liverpul" va Braziliya), Tibo Kurtua ("Real" va Belgiya), Emiliano Martines ("Aston Villa" va Argentina), Manuel Noyer ("Bavariya" va Germaniya), David Rayya ("Arsenal" va Ispaniya), Yan Zommer ("Inter" va Shveysariya) va Voysex Shesni ("Barselona" va Polsha) ham sovringa da’vogarlik qilgandi.
The Best mukofoti g‘oliblarini tanlashda 2024 yil 11 avgustdan 2025 yil 2 avgustgacha bo‘lgan davrdagi chiqishlar hisobga olinadi. G‘olib terma jamoa sardorlari va murabbiylari, muxlislar va OAV vakillari tomonidan ovoz berish yo‘li bilan aniqlanadi.
