Krishtianu Ronaldu «An-Nasr»ning avvalgi o‘yinini boykot qilgan edi va xabarlarga ko‘ra, navbatdagi bahsni ham o‘tkazib yubormoqchi. Portugaliyalik yulduz Saudiya Arabistoni Suveren jamg‘armasi klubni boshqarish usulidan norozi.
Ushbu boykot fonida «An-Nasr» Krishtianu Ronalduni tug‘ilgan kuni bilan tabrikladi. Payshanba kuni portugaliyalik futbolchi 41 yoshga to‘ldi.
«Afsona yuksalishda davom etmoqda. Sening ishingga bo‘lgan sadoqating, mentaliteting va yetakchiliging orzularimizni oldinga boshlamoqda. Tug‘ilgan kuning bilan, Krishtianu!» — deyiladi «An-Nasr»ning ijtimoiy tarmoqlardagi rasmiy sahifasida.
Ertaga, juma kuni (6 fevral) Saudiya Arabistoni chempionati doirasida «An-Nasr» «Al-Ittihod»ga qarshi maydonga tushadi.
