«Fiorentina» hujumchisi Moyze Kin «Milan»ning transfer rejalariga kirdi. Calciomercato nashrining xabar berishicha, «qizil-qoralar» «binafsharanglilar» yulduzining yozgi transferi bo‘yicha muzokaralar o‘tkazishga tayyor. 25 yoshli futbolchining shartnomasida 62 million yevro miqdorida tovon puli belgilangan, biroq «Milan» rahbariyati bu summani haddan tashqari yuqori deb hisoblamoqda va boshqacha shartlar asosida kelishish niyatida.
Joriy mavsum Moyze Kin uchun u qadar muvaffaqiyatli kechmayapti: u Florensiya jamoasi safida 25 ta o‘yinda maydonga tushib, 6 ta gol va 3 ta golli uzatmani amalga oshirdi. Transfermarkt portali italiyalik futbolchining narxini 45 million yevroga baholamoqda, uning amaldagi shartnomasi esa 2029 yilgacha mo‘ljallangan.
