«Фиорентина» ҳужумчиси Мойзе Кин «Милан»нинг трансфер режаларига кирди. Calciomercato нашрининг хабар беришича, «қизил-қоралар» «бинафшаранглилар» юлдузининг ёзги трансфери бўйича музокаралар ўтказишга тайёр. 25 ёшли футболчининг шартномасида 62 миллион евро миқдорида товон пули белгиланган, бироқ «Милан» раҳбарияти бу суммани ҳаддан ташқари юқори деб ҳисобламоқда ва бошқача шартлар асосида келишиш ниятида.

Жорий мавсум Мойзе Кин учун у қадар муваффақиятли кечмаяпти: у Флоренция жамоаси сафида 25 та ўйинда майдонга тушиб, 6 та гол ва 3 та голли узатмани амалга оширди. Transfermarkt портали италиялик футболчининг нархини 45 миллион еврога баҳоламоқда, унинг амалдаги шартномаси эса 2029 йилгача мўлжалланган.