«Barselona» sport direktori Deku kataloniyaliklar himoyachi Andreas Kristensenga yangi shartnoma taklif qilishini tasdiqladi.

Klub mutasaddisining ta’kidlashicha, «Barselona» jarohat olgan futbolchini qiyin vaziyatda qoldirmoqchi emas. Kristensen tizza paylarining uzilishi sababli joriy mavsumda boshqa maydonga tusha olmasligi mumkin, shu sababli klub unga 2027 yilgacha mo‘ljallangan (amaldagi shartnomani yana bir yilga uzaytiruvchi) «adolatli taklif» berishga qaror qilgan.

«Biz futbolchini murakkab ahvolda qoldirishni istamaymiz, chunki u mavsum oxirigacha boshqa o‘ynay olmasa kerak deb hisoblaymiz. Shu bois, unga adolatli va qabul qilish mumkin bo‘lgan variant taklif qilmoqchimiz. Shundan so‘ng futbolchi mustaqil qaror qabul qilishi mumkin bo‘ladi. U "Barselona"da qolishga majbur emas, lekin biz hech bo‘lmaganda u ko‘rib chiqishi mumkin bo‘lgan taklifni berishga harakat qilamiz», — dedi Deku matbuot anjumanida.

Andreas Kristensen 2022 yilda «Chelsi»dan erkin agent sifatida «Barselona»ga o‘tgan edi. Uning amaldagi shartnomasi 2026 yilning 30 iyuniga qadar belgilangan. Joriy mavsumda 29 yoshli daniyalik himoyachi 17 ta o‘yinda qatnashib, bitta gol urishga ulgurdi.